۱۳۸۸ فروردین ۲, یکشنبه
یھتہ بھــــــار
یھتہ بھــــــار
کــوکــو تـــوار و بلبل ماں باگ انت، یھتہ بھــــار
کــوہ و چمــن سبـــــز انت گیابان، یھتہ* بھــــــار
رپت* انت تھـــــاری وسردی، گرم انت پــــــــــدا
پل وگلاب انت، شھــــــــد و شراب، مسکئیں دگـار
بھــار انت و نـــــوروز دشت وگیابان، ھر نئیــمگا
شیر انت و شیلانچ، مال انت و دلوت، تیتوک* ھنــار
ملک ســــــوھت وتبــہ بــوت، دوت مئی ســـــــما
چــرس انت وبنگ انت، تریــاک، ھروئیــــــن ودار
واب ائیـــــں بلۓ ما روچ وشپ، گنگ وگــــــــدام*
گپــــاں کنئیـــں ما دیگرے، بیــگواہ وتی نــــام وتوار
شرمئیـــــں کتہ ناما وتی، لبزو نشـــــان، ملکا وتی
ائـــیش انت مئی اے حال ۓ زار، اؤ مـــــــژدہ وار*
چــم بستگ و گـــوش لؤکہ*، بلے پریات و زار انت
لاپ گژنہ* ودپ تژنہ*، زھرا ورئیں چہ زوم و مــــار
چم کؤر انت اچ ھاک و آس، ماں پوجگلا پاد بڈتـگ
دؤزواہ بیا چم کنجلئیں، مہ پیــکر و درئین گوھــــــار
چست بؤ چہ وابا، دنیا شتگ مـــــــــــــــــاہ ۓ سرا
ما وتا مانپؤشتگ ماں برقعـــــــــــــــــــا لؤگ و دوار
بس کں دگہ جان سستگئیں، دل پرشتــہ و گیں مرتگئیں
ناچاں بزورشستـــــون منی، یھتہ بھار، یھتہ بھــــــــار
=
*دلگوش*
یھتہ: یھتگ، آتکگ
رپت: شت، رفت
تیتوک: ھنارۓ پل یا گل
گنگ وگدام: ھما `گنکدام`،(بزان بے دپ وبے زبان انت کہ پہ شعرۓ خاطرا من تگلئینتگ
مژدہ وار: کسے کہ عادت کرتہ و نلوٹیت پہ وتی دیمرویا کارے بکنت
لؤکہ: کرباس ۓ پل ، پنبہ
تژنہ: تنیگ ، تشنہ
گژنہ: شدیگ، گشنہ، گرسنہ
شستونی بلوچ
یکم فروردین [حمل] 1388
21 مارچ 2009
