۱۳۸۷ فروردین ۱, پنجشنبه
بهارگاه و مهر
بھــــار گاہ و مھـــــــــــر
زھـــــــرۓ بدل مھـــــــــــــر ودیـــــــگ انت
ســـــــوگۓ بدل جشـــــــــن ودیـــــــگ انت
جـــــــورۓ بدل شـھــــــــــد ودیــــــگ انت
جنگـــــــۓ بدل امـــــــــــن ودیــــــــگ انت
ڈکالــــــــۓ بدل بھـــــــاراں ودیــــــــگ انت
شســـتونی دلــــۓ ارمانـاں ودیـــــــگ انت
امیت انت کھ بھارگاہ و نوروز و نوکین سالۓ ٹیکی اے بہ بنت:
پہ دلپروشتگان امیت
پہ نادراھاں جانوشی
پہ دلسیاھاں دلوشی
پہ بندیگاں آزاتی
وشنام بات ات!
بهارگاه مبارک!
شستونی بلوچ _ بلوچی نام ونشان
http://balochinames.blogspot.com
۱۳۸۶ اسفند ۱۸, شنبه
بلوچ جنئین و جھانی جنئینانی رؤچ
بلوچ جنئین و جھانی جنئینانی رؤچ
شستونی بلوچ
8 مارس 2008 ، 17 اسفند 1386
ھنوں یکسد 100 سال انت کہ 8 مارچ جھانی جنئینانی روچۓ نام دیگ بوتہ و اے روچ جنئنانی آزاتی، یکوئی و برابریۓ جوانئین مستاگ انت۔
مئی گوھار، مات، لؤگۓ ھمسر و بلوچ جنئینۓ مھر، وفا، زحمت، اؤپار و بھادری چہ کسا اندئیم نہ انت و بلوچ تاریخا بازئین نمونہ و افتخار بوتہ۔ اے دؤر و زمانا وھد ائیش انت کہ بے ھچ وڑین تعصب و جاھلی حمیتے ما درستان وتی دردانگین پلوچ گوھارانی کمک و مدتا بؤشت این، چیا کہ جنینانی آزاتی و برابری حقیقتا انسانانی برابری انت۔
`ستر` چے انت؟
بلکین 30 سال پیسرا کدی ما وشما سترۓ نام ھم نہ اشکت ات و کسے ھم نہ گواہ نداتت کہ بلوچ جنینا سترے بہ بیت یا نزانان برقع و سیاہ جلے سرا مانپوشگ بہ بیت۔ افسوزۓ گپ ایش انت کہ مروچیگیین بلوچی چاگردا جنین و مردینۓ سلام و علیک و گپ و تران و گند و نند ھم مزنین گناھے زانگ بیت و محرم و نامحرمۓ نیمونا مئی جنینانی حق و حقوق پاد لگاش بیت انت۔ گرانئین گپ ایش انت کہ اے جاھلی رسم و رواجانانا بلوچی روایتۓ نام دیگ بوتہ تا کسے ھم چیزے گشت مہ کنت ۔
سیاد و کومی واجتماعی چاگرد
باریں شما کدی اے جستا چہ وتا کرتہ کہ چیا چک و زھگانا پہ ماتۓ ناما توار نہ کن انت وتھنا آیانا پتۓ نام پر انت و تنتنے سجل و شناسنامہ و فرم کار و کاغذاتا ھم چہ `نام پدر` بزان پتۓ نام جست کن انت و فامیل و ذات و زریاتۓ نامۓ تھا ھم کسے نہ گوشیت کہ مات کۓ انت، چيا کہ `چک چے پت انت!` و درستاں ھم منتگ۔
سور و آروس و دلوشیانی درگتا ھم سالؤنکے جاندراھی ومبارکبادیۓ شعراں الحان بنت و بانورۓ نام ھم گوشگ نہ بیت و دعوتی کارتۓ سرا ھم نبییسگ نہ بیت، چیا کہ `شرم و حیا ۓ خبر انت!`۔
گپ مجن ات خاموش بہ بئیت!
ضرور شما اشکتگ که مئی لهتئ بلوچ گوھار هنگت ته بیستمی و بیست یکمی سدی مان بلوچستان و در چه بلوچستانا هم هر پئیمین زورانکی و کشت و کوشئ آماچ انت و تنتن بیرحمی پیمے وتی شو و شریک زندگیۓ دستا کوشگ بوتگ ات۔ روزگارۓ تھلئین طنز و حقیقتا بچارت کہ مئی وتگڑیں روشنفکران و بلوچ سیاستکارین گروہ و سازمانانۓ گؤشا مؤرے ھم نوارت کہ اۓ باریا ھم یک چمشانکے جاھے نہ جاھے نبشتہ بکن انت!
بلوچئین گوهاران ! 8 مارچ جنینانی جهانی روچ شمارا وش بات!
آخر سرا پدا وتی یک کوھنیں پربندے بلوچ گوھارانی سرا ندر کنان۔ امیت انت کہ پسندش بہ بؤت!
او منی گوهار
پہ بلوچ شیرزالان
او منی گوھـــــــــار، او منی گوھـــــــــــار
چمّـــــــــان وتی پچ کن بچــــــــــــــــــــــار
بشکن وتــــــــی براتــــۓ تــــــــــــــــــوار
نیست انت منــــــا بازیـــــــں قــــــــــــــرار
او منی گوھـــــــــار، او منی گوھـــــــــــار
پــــــر چا تو ھستۓ بـــــے تــــــــــــــــوار
بیا منی گوھـــــــار، بؤشت مــئ کنــــــــار
جــــــاہ تئی نہ انت بس مــــــــــــــاں دوار
او منی گوھـــــــــار، او منی گوھـــــــــــار
در بـــــــؤ چہ اے لونجیـــــں تھـــــــــــــار
دیـــــما وتی دستـــــــــان شھــــــــــــــــــار
حقـــــــــــان وتی پجّــــــــاہ بیـــــــــــــــــار
او منی گوھـــــــــار، او منی گوھـــــــــــار
پــــــــــر چا گریـــــــــــــــــــوۓ زار و زار
تــــــــئ دل، من زانان نیست تـــــــــــــلار
بلۓ اے بوت نہ کنت انت تـــئ ســــــــزار*
من الــّماں او منـــــی گوھــــــــــــــــــــــار
دگنیــــــــــا نہ بیت انت یک قــــــــــــــــرار
بلّ بازیــــــــن وتی لـــج و میــــــــــــــــــار
بیـــــــا بؤشت گؤں مــــــردان یک کتـــــار
او منی گوھـــــــــار، او منی گوھــــــــــــار
پــاد آ ! کنیـــــن سلّ رسمـــے گـــــــــــــار
پــچ کنیـــــن راھے پہ آ نوکیــــــں دیــــــار
او وارک * منـــــی، او منی گوھـــــــــــــار
شستـــــــــــون ۓ تــواراں گـــوش بــــــدار
استــــــــون جنت انت یک قــــــــــــــــــــرار
تــــــــاں کـــــــــد بنندیــــــن انتظـــــــــــــار؟
٭ سزار = مراد ھما `سزاوار` انت کہ پرپندۓ خاطرا من پہ `سزار` بدل کرتہ۔
٭ وارک = شستــونی لھجہ ۓ تھا ما `گوھار` ھم گوشین و `وارک` ھم گوشیں۔
